மக்கள் நிலை அறியாதவர்கள்!

நிதிப் பற்றாக்குறையைச் சமாளிப்பதற்கான யோசனைகளைக் கூறுவதற்காக மத்திய அரசினால் நியமிக்கப்பட்ட விஜய் கேல்கர் கமிட்டி அளித்துள்ள பரிந்துரைகளில் முதன்மையானவை என்று சொல்லத்தக்கவை ஆறு. அவை:
1. டீசல் விலையைக் குறைத்து விற்பனை செய்வதற்காக எண்ணெய் நிறுவனங்களுக்கு அளிக்கப்படும் மானியத்தைக் குறைக்க வேண்டும். முதல் கட்டமாக 2013 மார்ச் மாதத்திற்குள்ளாக டீசலுக்கு தற்போது வழங்கப்படும் மானியத்தைப் பாதியாகக் குறைக்க வேண்டும். மீதியை 2014 மார்ச் மாதத்துக்குள் முற்றிலுமாக இல்லாமல் செய்துவிட வேண்டும். நிகழாண்டில் டீசல் விலையைக் குறைந்தது லிட்டருக்கு ரூ.4 உயர்த்த வேண்டும்.
2. மண்ணெண்ணெய் விலையை லிட்டருக்கு ரூ.2 உயர்த்த வேண்டும். இதற்கு, தற்போது ஒதுக்கப்படும் மானியத்தை மூன்றில் ஒரு பங்காகக் குறைத்துவிட வேண்டும்.
3. அடுத்த நான்கு ஆண்டுகளுக்குள், சமையல் எரிவாயு உருளைகளுக்கு அளிக்கப்படும் மானியத்தைப் படிப்படியாகக் குறைத்து, முற்றிலும் இல்லாமல் செய்துவிட வேண்டும். முதல்கட்டமாக 2012-13 நிதியாண்டில் 25% மானியத்தை குறைத்துக்கொள்ள வேண்டும்.
4. தற்போது உணவு மானியமாக ரூ.85,000 கோடி செலவாகிறது. நெல், கோதுமை போன்ற உணவு தானியங்களுக்கு ஆதார விலை அறிவிக்கும் அதே வேளையில், நியாயவிலை கடைகளுக்காக மத்திய அரசு வழங்கும் விலையையும் உயர்த்த வேண்டும். அதேபோன்று, வறுமைக் கோட்டுக்கு மேலே வாழ்பவர்களுக்கு வழங்கப்படும் உணவு தானியங்களுக்கான மானியத்தை ரத்து செய்து, சந்தை விலையில் பொருள்களை விற்பனை செய்ய வேண்டும்.
5. உரங்களுக்கு அளிக்கப்படும் மானியத்தைப் படிப்படியாக குறைத்து, யூரியா, நைட்ரேட் பாஸ்பேட் உரங்களை அதன் சந்தை மதிப்புக்கேற்ப அரசே ஆண்டுதோறும் விலை நிர்ணயம் செய்யலாம்.
6. மானியத் தொகையைப் பொருளாக வழங்காமல், பணத்தை நேரடியாக வங்கிக் கணக்கில் செலுத்திவிட்டால், அமலாக்கக் குறைபாடுகள் இல்லாமல் செய்துவிட முடியும்.
இந்தப் பரிந்துரைகளை அமல்படுத்தினால் நிதிப் பற்றாக்குறை அளவைப் பெருமளவு குறைத்துவிட முடியும் என்று பட்டியலிடுகிறது கேல்கர் கமிட்டி. இதுதவிர, பொதுத்துறை நிறுவனங்களின் பங்குகளை விற்றுப் பணம் பெறும் வழிமுறை, பயன்படாத, பயன்படுத்தப்படாத அரசு நிலங்களை விற்பனை செய்து பணம் பெருக்கும் வழிமுறை என்று பலவிதமான யோசனைகளும் இக்கமிட்டியின் பரிந்துரைகளில் அடங்கும்.
டீசல் விலையை ஏற்கெனவே ரூ.5 உயர்த்திவிட்டார்கள். சமையல் எரிவாயு உருளை ஆண்டுக்கு 6 மட்டுமே மானிய விலையில் கிடைக்கும் என்று மானியத்தின் அளவை ஏறக்குறைய 50% குறைத்துவிட்டார்கள். ஏழைகளுக்கான மானியத் தொகையைப் பணமாக நேரடியாக வங்கியில் செலுத்தும் நடைமுறையை சில நகரங்களில் சோதித்துப் பார்த்துக்கொண்டிருக்கிறார்கள். தமிழ்நாட்டில் இது மகாத்மா காந்தி ஊரக வேலைவாய்ப்பு உறுதித் திட்டத்தில் தற்போது அமல்படுத்தப்பட்டு வருகிறது. அடுத்தது நியாயவிலைக் கடைகளில் விற்பனை செய்யப்படும் உணவுப் பொருள்களின் விலையை உயர்த்துவதும், உரமானியத்தைக் குறைப்பதும், மண்ணெண்ணெய் விலையை உயர்த்துவதும்தான் அடுத்தகட்ட நடவடிக்கையாக இருக்கும்.
டீசல், பெட்ரோல், சமையல் எரிவாயு, உரம், உணவுப்பொருள் எல்லாமும் சந்தை விலையில் மக்களைச் சென்றடைய வேண்டும் என்பதுதான் கேல்கர் கமிட்டி சொல்லும் பரிந்துரையின் அடிப்படை நோக்கம். இதில் வறுமைக் கோட்டுக்குக் கீழே வாழும் ஏழைகளுக்கு மட்டும் உணவுப் பொருள் மானியத்தைத் தொடர்ந்து வழங்கப் பரிந்துரைக்கும் கேல்கர் கமிட்டி, இந்த மானியத் தொகையும்கூட ரூ.1,000-க்கு அதிகமாக இருக்குமென்றால் அந்தக் குடும்பத்துக்கு நேரடியாகப் பணமாகக் கொடுத்துவிடுங்கள் என்கின்றது.
அதாவது அப்படி பணமாகக் கொடுத்துவிட்டால், அந்த ஏழை நேரடியாகப் பொதுச்சந்தையில், சந்தை விலையில் உணவுப் பொருள்களை வாங்கிக்கொள்வார் என்பது அரசின் கருத்து. மற்ற எல்லா பரிந்துரைகளைக் காட்டிலும் இது மிகவும் மோசமான விளைவுகளை ஏற்படுத்தும் என்பதே நடைமுறை உண்மை.
உணவுப் பொருள்களுக்கான மானியத்தை நேரடியாகக் கொடுத்தால் குடும்ப அட்டையில் குறிப்பிட்டுள்ள குடும்பத் தலைவருக்குத்தான் தர முடியும். குடும்பத் தலைவர் கணக்கில் மாதம் ரூ.1,000 வங்கிக் கணக்கில் செலுத்திவிடும் நடைமுறை வருகின்றது என்று வைத்துக்கொள்வோமேயானால், தமிழ்நாட்டைப் பொருத்தவரை என்ன நடக்கும்? முதலில் நியாயவிலைக் கடைகளுக்கு அவசியமே இருக்காது. இரண்டாவதாக, இந்த ஆயிரம் ரூபாய் மானியம், யாருடைய லஞ்சத்துக்கும் அவசியமில்லாமல் நேரடியாகக் கிடைத்தாலும்கூட, குடும்பத் தலைவருக்கு மட்டும்தான் கிடைக்கும். அவர்களில் பெரும்பாலோர் அந்த ரொக்கப் பணத்தை மதுக்கடைக்குத்தான் செலவழிப்பார்கள்.
அதாவது, தற்போது வீட்டுத் தலைவர் குடிகாரராக, குடும்பச் செலவுக்குப் பணம் கொடுக்காதவராக இருந்தாலும், தமிழக அரசு தரும் 20 கிலோ இலவச அரிசியால் உயிர்வாழ முடியும். அதைவிடுத்து, இந்த மானியத் தொகையை நேரடியாகக் குடும்பத் தலைவனிடம் கொடுத்தால், குடும்பமே பட்டினிக்கு ஆளாகும். மானியம் மதுவாக மாறும் அவலம் அரங்கேறும்.
போலி குடும்ப அட்டைகள், போலி முதியோர் உதவித்தொகைபோல, இந்த மானியத்துக்குப் போலி "ஆதார்' அட்டைகள் வராது என்பது என்ன நிச்சயம்? அரசு நிர்வாகம் என்பது தொழில்துறை நிறுவனங்களை நிர்வாகம் செய்வதுபோல அல்ல. நிர்வாகவியலிலும் நிதிநிர்வாகமும் படித்தவர்கள் தொழில் நிறுவனங்களைத் திறம்பட நடத்தலாமே தவிர, நாட்டு நிர்வாகத்தை நடத்த முற்படும்போது இதுபோன்ற "ஏட்டுச்சுரைக்காய்' முடிவுகள் மேற்கொள்ளப்படுவதில் வியப்பொன்றுமில்லை. மேலை நாடுகளில் தோல்வியடைந்துவிட்ட சந்தைப் பொருளாதாரத்தை இந்தியாவில் நிறைவேற்றத் துடிக்கும் ஆட்சியாளர்களின் அறியாமைக்கு எடுத்துக்காட்டுதான் கேல்கர் கமிட்டியின் பரிந்துரைகள்.
இந்திய அரசு பல்வேறு திட்டங்களுக்காக அளிக்கும் மக்களுக்கான மானியத்தின் அளவு 3.25 லட்சம் கோடி ரூபாய்.
ஆனால், 2ஜி அலைக்கற்றை ஒதுக்கீடு, நிலக்கரிச் சுரங்க ஒதுக்கீடு ஆகியவற்றில் அரசுக்கு ஏற்பட்டுள்ள இழப்பு (1.76+1.86) ரூ. 3.62 லட்சம் கோடி! முதலாவது மக்கள் மானியம். இரண்டாவது ஆட்சியாளர்களின் "மானியம்'. முதலில் ஆட்சியாளர்களின் "மானியத்தை' ஒழித்துவிட்டு, சராசரி குடிமகனின் மானியத்தை ஒழிக்க முற்பட வேண்டுமென்று பரிந்துரைக்க ஒரு கமிட்டியை யார் அமைப்பது?

nandri: dinamani thalaiyangam.

ஈழத்தமிழருக்காய் தீக்குளித்த விஜயராஜ் வீரமரணம்

ராஜபக்ஷவின் இந்திய வருகைக்கு எதிர்ப்பு தெரிவித்து சேலம் போஸ் மைதானத்தில் நேற்று அதிகாலை 4.30 மணி அளவில் தீக்குளித்த விஜயராஜ் இன்று உயிரிழந்துக்கதாகத் தெரிவிக்கப்பட்டுள்ளது
ராஜபக்சேவின் இந்திய வருகைக்கு கண்டனம் சேலத்தில் ஆட்டோ டிரைவர் தீக்குளிப்பு
நேற்று காலை அவர் சேலம் பேருந்து நிலையத்தில் மண்ணெண்ணெயை உடலில் ஊற்றிக்கொண்டு இலங்கை ஜனாதிபதி மஹிந்த ராஜபக்ஷவுக்கு எதிரான கோஷங்களை எழுப்பியதுடன் போர்க்குற்றவாளியான அவர் இந்தியாவிற்கு வரக்கூடாது என்றும் உரக்க கத்தினார்.அத்துடன் திடீர் என்று உடலில் தீ வைத்துக்கொண்டார்.
80 வீத உடல் எரிகாயங்களுடன் அனுமதிக்கப்பட்ட இவருக்கு தீவிர சிகிச்சை அளிக்கப்பட்டுவந்தது. இந்தநிலையில் அவர் இன்று சிகிச்சை பயனின்றி சாவடைந்துள்ளார்.
தமிழ் ஈழ ஆதரவாளரான விஜயராஜ் பெரியார் பற்றாளர். அவரது குடும்பத்தைச் சேர்ந்தவர்கள் அனைவரும் கொளத்தூர் மணி தலைமையிலான திராவிடர் விடுதலை இயக்கத்தைச் சேர்ந்தவர்கள்.
விஜயராஜ் தினம் டயரி எழுதும் பழக்கமுடையவர். வைகோ. சீமான். கொளத்தூர் மணி கலந்துகொள்ளும் கூட்டங்களில் பங்கேற்கும்போது. அங்கு ஏற்படும் உணர்வுகளை தனது டயரியில் பதிவு செய்து வந்துள்ளார். தீக்குளிப்புக்கு முன்பு அவர் தனது டயரியில் எழுதியிருப்பதாகக் கூறியதாவது.
இந்திய அரசு இலங்கைக்கு ஆயுதங்கள். டாங்கிகள். போர் விமானங்கள் என்பவற்றைக் கொடுத்து தமிழர்களுக்கு தொடர் துரோகம் இழைத்துள்ளது.
இந்திய மத்திய அரசும். சோனியா காந்தியும் இன்னும் திருந்தவில்லை. இனியாவது இவர்கள் திருந்த வேண்டும். என்னுடைய உயிர் ஆயுதத்தைப் பார்த்து தமிழர்கள் ராஜபக்ஷவை செருப்பால் அடிக்க வேண்டும். அதற்காகத்தான் இதை நான் செய்தேன்.
ராஜபக்ஷவை இந்தியாவிற்குள் விடக்கூடாது. இத்தனை வீரமரணத்திற்கும் பிறகும் ராஜபக்ஷவுக்கு இந்திய அரசு வரவேற்பு கொடுக்கிறது. என தீக்காயங்களுடன் நேற்று அவர் தனது வேதனையை வெளியிட்டிருந்தார்.
அத்துடன்”இலங்கையில் தமிழர்களைக் கொன்று குவிப்பதே ராஜபக்ஷவின் வேலை. ஈழத்தமிழர்களின் வீழ்ச்சிக்கு இந்திய அரசும் அப்போது ஆட்சியிலிருந்த தி.மு.க. அரசும்தான் காரணம். என்னைப் பற்றி யாரும் கவலைகொள்ள வேண்டாம்.ஈழ மக்கள்மீது அக்கறை கொள்ளுங்கள்” இவ்வாறு நேற்று அதிகாலை சேலத்தில் தன்னைத்தானே தீ மூட்டிக்கொண்ட விஜயராஜ் எழுதிய 36 பக்க கடிதத்தில் குறிப்பிடப்பட்டுள்ளது.
”இலங்கை தமிழர்கள் காப்பாற்றப்பட வேண்டும். இலங்கை தமிழர்களுக்கு முழு பாதுகாப்பும் சுதந்திரமும் கிடைத்தால் தான் என் ஆத்மா சாந்தியடையும். ராஜபக்ஷ இந்தியா வரக்கூடாது” என அவர் தனது கடிதத்தில் இந்திய மத்திய அரசு.தமிழக முன்னாள் அரசு.இலங்கை ஜனாதிபதி ஆகியோரை கடுமையாக விமர்சித்து எழுதியுள்ளார்.
விஜயராஜ் எழுதிய 36 பக்ககடிதம் ஒன்று பொலிஸாரிடம் கிடைத் துள்ளது. இந்த கடித புத்தகத்தை ஓட்டோவில் இருந்து கைப்பற்றியதாக பொலிஸார் தெரிவித்துள்ளனர்.
மன்மோகன்சிங், சோனியா, ராஜபக்சே மீது வழக்கு பதிவு செய்யவேண்டும் : விஜய் உடலை வாங்க மறுத்து கதறல் – ஆர்ப்பாட்டம்

 ராஜபக்சே இந்தியா வருவதை கண்டித்து நேற்று தீக்குளித்த சேலம் ஆட்டோ டிரைவர் விஜய்ராஜ் இன்று சிகிச்சை பலனின்றி உயிரிழந்தார்.

அவரது உறவினர்கள் மற்றும் பல்வேறு தமிழ் அமைப்புகள் அவரது உடலை வாங்க மறுத்துள்ளனர்.

‘’எப்.ஐ.ஆர் காப்பியை பார்க்க அனுமதிக்க வேண்டும்,  கைப்பற்றப்பட்ட 36 பக்க கடிதத்தை திருப்பிக்கொடுக்க வேண்டும்,
அவர் கொடுத்த மரண வாக்குமூலத்தின் அடிப்படையில் பிரதமர் மன்மோகன்சிங், சோனியாகாந்தி, ராஜபக்சே ஆகியோர் மீது வழக்கு பதிவு செய்யவேண்டும்.  அப்படி செய்தால்தான் நாங்கள் உடலை வாங்குவோம்’’ என்று பிடிவாதமாக இருப்பதோடு அல்லாமல்,  உடலை போஸ்ட்மார்டம் செய்வதற்கும் அனுமதி அளிக்காமல் உள்ளனர்.
விஜயராஜ் உறவினர்களோடு, அனைத்திந்திய பெருமன்றம், விடியல் பெண்கள் மையம், விடுதலை சிறுத்தைகள் மற்றும் பல்வேறு கட்சியினர் ஆர்ப்பாட்டத்தில் ஈடுபட்டுள்ளதால்,  மருத்துவர்கள் மற்றும் போலீசார் சமாதானம் பேசிவருகின்றனர்.

ATM – ஏ டிஎம் தெரிந்ததும் தெரியாததும்!

ATM (Automatic Teller Machine)
ஏ.டி.எம் எப்படிச் செயல்படுகிறது என்பதைப் பற்றிய தகவல்கள் எல்லாம் மிகவும் சுவாரஸ்யமானது.

கட்டுக்கட்டாக பணத்தை பாக்கெட்டில் வைத்துக் கொண்டு இப்போதெல்லாம் பஸ்சில் பதட்டப்பட்டுக்கொண்டே யாரும் பயணிப்பதில்லை. காரணம் ஏடி. எம் அட்டைகள்.

வங்கியில் கணக்கை ஆரம்பித்த அனைவருக்குமே ஒரு அட்டை கிடைக்க தற்போது எல்லா வங்கிகளும் வசதி செய்துள்ளன. எப்போது தேவையோ அப்போது எடுத்துக் கொள்ளலாம் எனும் நிலையும், எல்லா தெருக்களுக்குள்ளும் நுழைந்துவிட்ட தானியங்கி இயந்திரங்களும் பணத்தை தூக்கிச் சுமக்கும் பணியை குறைத்திருக்கின்றன.

நாம் பணம் தேவைப்படும் போது ஏ.டி. எம் முன்னால் சென்று நிற்கிறோம், நமது அட்டையை உள்ளே நுழைக்கிறோம். சங்கேத எண்ணை அமுக்குகிறோம். நம்முடைய கட்டளைக்கு ஏற்ப பணம் கிடைக்கிறது. திருப்திப்பட்டு விடுகிறோம்.

Automatic Teller Machine என்பதன் சுருக்கம் தான் ATM. நம்முடைய அட்டையில் 16 எண்கள் கொண்ட ஒரு எண் இருக்கும். இது நம்மைப் பொறுத்தவரையில் ஒரு சாதாரண எண். ஆனால் இதன் ஒவ்வொரு எண்ணிற்கும் தனித்தனி அர்த்தங்கள் உண்டு.

முதல் ஆறு எண்கள் அட்டை எந்த வங்கியிடமிருந்து பெறப்பட்டிருக்கிறது என்பதைக் குறிக்கும். அதற்கடுத்த ஒன்பது எண்களும் சேவை வழங்கு நிறுவனங்களின் விருப்பத்தைப் பொறுத்த எல்லைக்குள் இருக்கும். கடைசி எண் ஒரு ரகசிய எண். அதுதான் உங்கள் அட்டை பயன்படுத்தக் கூடியதா இல்லையா என்பதைச் சொல்லும்.

மாஸ்டர்கார்ட் எண்கள் ஐந்து எனும் எண்ணில் ஆரம்பிக்கும், விசா எண்கள் நான்கு எனும் எண்ணில் ஆரம்பிக்கும் என்பது ஒரு சிறு சுவாரஸ்யத் தகவல்.

அட்டைகளை இரண்டு பெரும் பிரிவாகப் பிரிக்கலாம். ஒன்று கிரடிட் கார்ட் எனப்படும் கடனட்டைகள். இன்னொன்று டெபிட் கார்ட் அல்லது செக் கார்ட். கடனட்டையில் நாம் செலவழிக்கும் பணத்தை மாதம் ஒருமுறை செலுத்தினால் போதும். செக் கார்ட் மூலம் செலவழிக்கும் பணம் நம்முடைய வங்கிக் கணக்கிலிருந்து உடனே கழிக்கப்பட்டு விடும்.

ஏடிஎம் முன்னால் சென்று அட்டையை உள்ளே செலுத்தி நம்முடைய சங்கேத எண்ணைக் குறிப்பிட்டபின் நமக்கு எவ்வளவு பணம் தேவை என்பதைக் குறிப்பிட்டு பொத்தானை அமுக்குகிறோம். நம்முடைய அட்டையின் பின்னால் இருக்கும் மேக்னட்டிக் ஸ்ட்ரைப் நம்முடைய அட்டையின் எண்ணை மென் குறியீடாக்கி உள்ளே அனுப்பும். அதற்குப் பயன்படும் இடம் தான் கார்ட் ரீடர் எனப்படும் நாம் அட்டையை உள்ளே நுழைக்கும் இடம். அப்போது கட்டளை ஏடிஎம் முனையிலிருந்து சுவிட்ச் என அழைக்கப்படும் கணினி மென்பொருளுக்குள் நுழைகிறது. இங்கே இரண்டு விதமான சோதனை வளையங்கள் இருக்கின்றன. முதலில் நாம் பயன்படுத்தும் அட்டை சரியானது தானா ? அதற்கு நாம் கொடுத்த சங்கேத எண் சரியானது தானா என்பதைச் சரிபார்க்கும் சோதனை.

இந்தச் சோதனை தோல்வியடைந்தால் நாம் ஏதோ தவறு செய்திருக்கிறோம் என்று பொருள். ஒருவேளை சங்கேத எண்ணைத் தவறாகச் சொல்லியிருக்கலாம்.

இரண்டாவது சோதனை நம்முடைய வங்கிக்கணக்கில் நாம் கேட்கும் பணம் இருக்கிறதா ? நான் பணம் எடுப்பதில் இன்றைய தினத்தின் உச்ச வரம்பை எட்டியிருக்கிறோமா ? என்பது குறித்த சோதனைகள். முதல் சோதனை முடிந்தபின், இரண்டாவது சோதனைக்குள் நுழைந்து இரண்டும் சரியாய் இருந்தால் பணம் கொடுக்கலாம் எனும் பதில் தானியங்கி முனைக்கு வரும். இந்த இரண்டு சோதனைகளையும் கடக்க பல இலட்சம் தகவல்கள் அடங்கியிருக்கும் மென் கோப்புகளில் தேடுதல் நடக்கும்.

இந்த தேடுதல் முடிந்து தானியங்கி முனைக்கு வரும் தாமதம் சில வினாடிகளே. இந்த வினாடிகள் அதிகரிக்கும் போது தான் நாம் சலித்துக் கொள்கிறோம்.

பணத்தை எண்ணித் தரும் பணம் பட்டுவாடா இயந்திரமும் நுட்பமான சென்சார்களால் ஆனது. இது தவறு இழைப்பதில்லை. இரண்டு நோட்டுகள் ஒட்டி வரும் எனும் ஆசை நப்பாசையாய் போய்விடும் என்பது திண்ணம்.

இன்னொரு சுவாரஸ்யமான விஷயமும் அடங்கியிருக்கிறது. நாம் நம்மிடம் ஒரு வங்கியின் அட்டை இருந்தாலும் வேறு வங்கியின் தானியங்கி நிலையமும் நமக்குக் பணம் கொடுக்கும். எப்படி ?

இதை செட்டில்மண்ட் என்பார்கள். அதாவது வங்கிகள் எந்தெந்த வங்கி அட்டைகளுக்குப் பணம் கொடுக்கிறதோ அந்தந்த வங்கிகளின் கணக்கில் அந்தப் பணத்தைச் சேர்த்துக் கொள்ளும். அன்றைய தினத்தின் இறுதியில் வங்கிகள் மற்ற வங்கிகளுக்கு எவ்வளவு கொடுக்க வேண்டும் என்பதை கணக்கிட்டு உடன்பாடு செய்து கொள்கின்றன.

மின் பண பரிமாற்றம் எனப்படும் இந்த தொழில்நுட்பம் மிகவும் சிக்கலானதும், பணம் ஈட்டக் கூடியதுமாகும். பல முன்னணி மென்பொருள் நிறுவனங்கள் இதை நடத்துகின்றன.

சரி, மென்பொருள் நிறுவனங்களுக்கு இதனால் எப்படி காசு கிடைக்கிறது ? இந்த தானியங்கி நிலையத்திலிருந்து செல்லும் கட்டளைகள் மென்பொருளோடு இணையாவிடில் ஒன்றுக்கும் உதவாது. இதன் பின்னால் இருக்கும் மென்பொருள் தான் வரும் தகவல்களைச் சரிபார்த்தல், பணம் பட்டுவாடா செய்ய உத்தரவிடுதல், மீதம் கணக்கிடுதல் என ஒட்டுமொத்தப் பணியையும் செய்கிறது. அனைத்து விவரங்களையும் மென் கோப்புகளில் சேமித்தும் வைக்கிறது. இந்த சுவிட்ச் எனப்படும் இந்த மென்பொருளுக்குள் வரும் தகவல்கள், அல்லது விண்ணப்பங்களுக்கு ஏற்ப மென்பொருள் நிறுவனம் வங்கிகளிடம் பணம் பெற்றுக் கொள்கின்றன.
அதாவது நீங்கள் பத்து முறை பணம் எடுக்கிறீர்கள் என்றால் மென்பொருளுக்குக் கிடைப்பது பத்து தகவல்கள். ஒவ்வொரு தகவலுக்கு ஒரு குறிப்பிட்ட தொகை மென்பொருள் நிறுவனத்துக்குச் செல்லும். தினமும் பல ஆயிரக்கணக்கான தானியங்கிகளில் நிகழும் இந்த பரிவர்த்தனை மூலம் பல கோடிக்கணக்கான பணம் மென்பொருள் நிறுவனங்களுக்குப் போய் சேர்கிறது. இதற்காகத் தான் ஆயிரக்கணக்கான மென்பொறியாளர்கள் பணியாற்றுகின்றனர். அதிலும் ஒவ்வொரு வங்கிக்கும் உரிய பிரத்தேக சட்டங்களின் அடிப்படையில் மென்பொருள் இயங்குவது தான் முக்கியம். குறிப்பாக சில வங்கிகள் ஒரு நாள் பத்தாயிரம் ரூபாய் மட்டுமே

ஏடிஎம் வழியாக எடுக்க அனுமதிக்கும். சில வங்கிகள் ஐம்பதாயிரம் ரூபாய் வரை அனுமதிக்கும். இதற்குத் தக்க படி மென்பொருள் தயாராக்கப் பட வேண்டும்.

அமெரிக்காவில் இருபத்து ஐந்திற்கும் முப்பத்து நான்கிற்கும் இடைப்பட்ட வயதுடையவர்களில் அறுபது சதவீதம் பேர் மாதம் எட்டு முறை ஏடிம் இயந்திரத்தைப் பணம் எடுக்க நாடுகிறார்களாம். பெரும்பாலான ஏடிஎம் நிலையங்களில் வெள்ளிக்கிழமைகளில் தான் அதிக பரிவர்த்தனை நடக்கிறதாம்.

ஏடிஎம் அட்டையைப் பயன்படுத்துபவர்கள் மற்றவர்களை விட இருபது முதல் இருபத்து ஐந்து சதவீதம் வரை அதிகமாகச் செலவழிக்கிறார்களாம்.

ஏடிஎம் அட்டைக்கு மிக முக்கியமானது பின் எனப்படும் சங்கேத எண். இது தானியங்கியில் அளிக்கப்பட்டவுடன் குறியீடுகளாக மாறிவிடும். அதன் பின் யாரும் அதை திருட முடியாது.

ஆனால் அது நம்மிடம் இருக்கும் வரை அதை நாம் தான் பாதுகாக்க வேண்டும். இல்லையேல் இழப்பு நமக்கு தான். அட்டையும் எண்ணும் கிடைத்துவிட்டால் யார் வேண்டுமானால் நம் வங்கிக் கணக்கிலிருந்து பணம் எடுக்க முடியும். இணையத்திலும் பொருட்கள் வாங்க முடியும்.

சங்கேத எண்ணை பத்திரமாய் வைத்திருக்க சில விஷயங்களைக் கவனத்தில் கொண்டால் போதும்.

சங்கேத எண்ணை எழுதி வைக்கக் கூடாது.

மறந்து விடுவோம் எழுதியே ஆகவேண்டும் என விரும்பினால் அதை வீட்டில் எங்காவது பத்திரமாய் எழுதி வைக்க வேண்டும்.

பர்சிலோ, ஏடிஎம் அட்டை இருக்கும் இடங்களிலோ வைக்கவே கூடாது.

சங்கேத எண் உங்களோடு தொடர்பற்றவையாக ஆனால் உங்களால் மறக்க முடியாததாக இருக்க வேண்டும்.

குறிப்பாக உங்கள் பிறந்த நாள், தொலைபேசி எண் போன்றவை இல்லாமல் இருத்தல் நலம்.

சங்கேத எண்ணை எழுதி வைக்கும்போது கூட அதை உங்களுக்கு மட்டுமே புரியும் சங்கேத மொழியிலேயே எழுதி வைக்கலாம்.

சங்கேத எண்ணை பயன்படுத்தும் போது தானியங்கிக்கு மிகவும் அருகாக குனிந்து மற்றவர்கள் பார்க்காத படி எண்களை பயன்படுத்த வேண்டும். குனிந்தபடி எண்ணை பயன்படுத்துவது ரகசியக் காமராக்களிடமிருந்து பெரும்பாலும் தப்ப வைக்கும்.

பணம் எடுத்ததும் உடனே பாக்கெட்டில் பாதுகாப்பாக வைத்துவிட்டு சென்று விடுங்கள். வீட்டில் சென்று எண்ணிப்பாருங்கள். எப்படியானாலும் தவறு நிகழ்ந்தால் அதை சம்பந்தப்பட்ட வங்கிக்குத் தான் தெரியப்படுத்த வேண்டும் எனவே தானியங்கி முன்னால் நின்று எண்ணிக்கொண்டிருப்பது தேவையற்றது.
யாராவது உங்களைத் தாக்கக் கூடும் எனும் பயம் தோன்றினால் ”கேன்சல்” பட்டனை அமுக்கி விட்டு பிறகு பார்த்துக் கொள்ளலாம் என்று கிளம்புங்கள்.

இரவு நேரங்களில் ஏடிஎம் பயன்படுத்த வேண்டியிருந்தால் ஆள்நடமாட்டம் அதிகமாக இருக்கும் இடங்களிலுள்ள ஏடிஎம் களைப் பயன்படுத்துங்கள்.

முக்கியமாக அட்டையின் பின்னால் இருக்கும் தொலைபேசி எண்ணை குறித்து வைத்துக் கொள்ளுங்கள். அட்டை தொலைந்ததை அறிந்தால் உடனே அந்த எண்ணுக்குத் தொடர்பு கொண்டு தகவல் தெரிவியுங்கள். உடனே உங்கள் அட்டையின் எண் ”ஏமாற்று” வரிசையில் சேர்க்கப்படும். அதன்பின் அந்த அட்டையை யாராவது பயன்படுத்தினாலும் அது ”ஏமாற்று வேலை” என்னும் முத்திரை இருப்பதால் நிராகரிக்கப்படும்.

அகில இந்திய எதிர்ப்பு நாள் 31-05-2012

     நியாயமற்ற மிகவும் மோசமான பெட்ரோல் விலை உயர்வைக் கண்டித்து நாடு முழுவதும் கண்டனத்தை தெரிவிக்கும் முகமாக வருகிற 31-05-2012  அன்று கண்டன  நாள் போராட்டம் நடத்திடுமாறு அகில இந்திய அளவில் அறைகூவல் விடப்பட்டுள்ளது.

   அதன்படி முழு அடைப்பு உள்ளிட்ட அனைத்து வடிவங்களிலும் போராட்டங்களில் ஈடுபடுமாறு மாநிலச் செயலர் தோழர் தா.பா அறிவித்துள்ளார். எனவே, அனைத்து மட்டங்களிலும் தீவிரமாக இப் போராட்டத்தை நடத்திடுமாறு அன்புடன் கேட்டுக்கொள்கிறேன்.

தோழமையுடன்,

ஆர். திருஞானம்,

மாவட்டச் செயலர்.

cpi - Online Slideshow Creator

இந்திய கம்யூனிஸ்ட் கட்சி 

பட்டுக்கோட்டை கிளையின் 

புதிய வெப்சைட் திறப்பு விழா!

புதிய வலைத்தளம் ( வெப்சைட் ) திறப்பு விழா.

     நமது  இந்திய கம்யூனிஸ்ட் கட்சி பட்டுக்கோட்டை  கிளையின் புதிய வலைதளத்தினை   இன்று மாலை 

நடைபெறுகின்ற தியாகிகள் தினப் பொதுக்கூட்டத்தில்   தோழர்.தா.பாண்டியன் அவர்கள் முறைப்படி திறந்து 

வைக்கிறார்கள் என்பதை உங்களுக்கு   மகிழ்வோடு

தெரிவித்துக் கொள்கிறோம்.

தோழமையுடன், 

R. திருஞானம், தஞ்சை மாவட்டச் செயலர். 

அரங்க.  சின்னப்பா        சி.பக்கிரிசாமி,              P.R. நாதன்,             N. காளிதாஸ். 

மாவட்டக்குழு தோழர்கள்.

 

                   அ . மார்க்ஸ்,                                                     புலவர். மு. முத்துவேல ஒன்றியச் செயலர்.                                                          நகரச் செயலர். பட்டுக்கோட்டை.  

அனைவரும் வருக!

No title - flash slideshow maker

தியாகிகள் தின சிறப்புக் கூட்டம்.

பட்டுக்கோட்டையில் தியாகிகள் தின சிறப்புக் கூட்டம்.

மாநிலச் செயலர். தோழர்.  தா. பா பேசுகிறார்.

தமிழ்நாடு கலை இலக்கியப் பெருமன்றம் 

பொன் விழா சிறப்பு மாநாடு.

அருமைத் தோழர்களே!  

நமது இலக்கியப்  பேராசான் தோழர். ஜீவா அவர்களால்      1961 மே 29 அன்று துவக்கி வைக்கப்பட்ட 

தமிழ்நாடு கலை இலக்கியப் பெருமன்றம் 

50 ஆண்டுகளை நிறைவு செய்யவுள்ளது.

வருகிற  மே  12,  13  சனி, ஞாயிறு  ஆகிய இரு நாட்களும்  பொன்விழா சிறப்பு மாநில மாநாடாக கோவையில் 

நடைபெறவிருக்கிறது. 

        மாநாட்டில் மன்றத்தின் முதல் மாநிலச் செயலர் 

தோழர் தா. பாண்டியன் அவர்களும், அருமைத் தலைவர், மூத்த  தோழர். நல்லக்கண்ணு அவர்களும் பங்கேற்கிறார்கள்.  

அது மட்டுமல்ல, கவிஞர்களும், கலைஞர்களும் ஆய்வறிஞர்களும்  பங்கேற்கிறார்கள்.            

மிகச் சிறப்பாக கலை நிகழ்ச்சிகள், பாடல்கள்,  நாடகங்கள் நடைபெறவிருக்கிறது.   நமது மன்றத் தோழர்கள் தவறாது பங்கேற்றுச் 

சிறப்பிக்குமாறு அன்புடன் கேட்டுக் 

கொள்கிறேன்.

தோழமையுடன், 

மூ. முத்துவேல்.

செயலர், 

தமிழ்நாடு கலை இலக்கியப் பெருமன்றம்,

பட்டுக்கோட்டை கிளை.

வீர வணக்கம்!

    

 நமக்காக ஒரு கூட்டம் உழைத்திருக்கிறது, உயிரை இழந்திருக்கிறது, சொத்தை, சுகத்தை, சுற்றத்தை என்று இழந்தது இன்னும் எவ்வளவோ!   அதனால் கிடைத்த பலன்களும்  அளவற்றது.   ஆனாலும் அப் பலன்களை இன்று வரை எட்டாதவர்களும் உண்டு.  

சரி!  நாம் என்ன செய்ய?

     எவ்வளவோ செய்யலாம்!   உழைக்கும் வர்க்கம் ஒன்று பட்டால் உலகே நமதாகும் என்பதை நாம் உணர்ந்த்தவர்களாய் இருந்தால்,

      அந்த ஒற்றுமையைக் காக்க உழைப்போம். 

    ஒற்றுமைக்கு ஊறு  விளைப்போரை அடையாளம் காண்போம், அவர்களை ஒற்றுமைக் கண்ணியில் இணைப்போம்!  இயலவில்லையெனில் அவர்களை அம்பலப்படுத்துவோம்! சரிதானே!

சரி! அவைகளை அடையாளம் காண்பது எப்படி?

  ஒன்று பட வேண்டியவர்கள் ஏன் பிரிந்து நிற்கிறார்கள்?    
      ஒற்றுமை கோஷம் எழுப்புபவர்கள் ஏன் ரெண்டு பட எண்ணுகிறார்கள்?     
      இழக்கப் போவது அடிமைச் சங்கிலிகளைத்தான் என்று கூறிக் கொண்டே அடிப்படை உரிமைகளையே இழக்கத் துணிகின்றார்களே?  
     ஏன்? எதற்காக இப்படி? என்ற கேள்விகளை நாம் எழுப்பத் துவங்கி விட்டால் அவர்களின் சுய ரூபம் தெரிய ஆரம்பிக்கும்? அப்பொழுது அவர்களை, அவர்களின்   இயக்கத்தை நம்மால்  சரியாக  அடையாளம் காண முடியும்.

        சரி, இதையெல்லாம் கேட்க, கவனிக்க நமக்கு எங்கே நேரம் இருக்கிறது  என்று எண்ணி வாளாவிருந்தால் வரலாறு நம்மை மன்னிக்காது.

  இந்த மே தினத்திலிருந்தாவது,  இந்த வகையில் எண்ணிச் செயல்பட்டால், மே தினத் தியாகிகளை எண்ணிப் பார்த்த புண்ணியமாவது நம்மைச் சேரும்.  அந்தத் தியாகம், அவர்களின் ரத்தம் சிந்திய வேதனை நமது சந்ததிக்கு வரவேண்டாமே!

    மே தினத் தியாகிகளே! உங்களுக்கு எங்கள் வீர வணக்கத்தை உரித்தாக்குகின்றோம். உங்கள் தியாகம் வீணாகாது. நீங்கள்  பெற்றுத் தந்த உரிமைகளை, சலுகைகளை  கண்ணின் மணிபோல் காத்திட சபதமேற்கிறோம்!

வாழ்த்துகளுடன்,

எஸ். சிவசிதம்பரம்.

பட்டுக்கோட்டை.     

     மே தினம் !


     நாடு தழுவிய வேலை நிறுத்தத்தை 1886 மே 1 ஆம் நாள் அன்று செய்திட வேண்டும் என்று அமெரிக்க தொழிலாளர் கூட்டமைப்பு அறிவித்தது. அந்த மே 1 ஆம் தேதியே மே தினமாக கடைபிடிக்கப்படுகிறது.

     அமெரிக்காவில் 126  ஆண்டுகளுக்கு முன்னர் 12 மணி நேரம், 18 மணி நேரம் என்று தொழிலாளர்கள் வேலை வாங்கப்பட்டு மிகுந்த கொடுமைக்கு உள்ளாயினர். 12 முதல் 15 வயதுக்குட்பட்ட குழந்தைகள் இரவில் தூங்க ஒரு மணி நேரமும், சாப்பிட ஒரு ரொட்டித் துண்டும் கொடுக்கப்பட்டு வேலை வாங்கப்பட்டனர். இலேசாக கண் அயர்ந்தால் கூட சாட்டையடிக்கு ஆளாவார்கள்.  

     தாங்கொணா இக் கொடுமையைக் காணச் சகியாத முன்னணி பத்திரிகையாளர்களான எங்கல், ஸ்பைஸ், பிஷர், பார்சன்ஸ்  ஆகியோர் தொழிலாளர்களைத் திரட்டி போராடத் தலைப்பட்டனர்.   இதன் வீச்சுதான் நாடெங்கும்  பெரும் கொந்தளிப்பை உருவாக்கியது. 
     எட்டு மணி நேர உழைப்பு கேட்டு ஹே மார்க்கெட் சதுக்கத்தில் திரண்டு வேலை நிறுத்தம் செய்தனர்.   இவ் எழுச்சியை பொறுத்துக்கொள்ள முடியாமல் முதலாளித்துவ வர்க்கம் தொழிலாளர்கள் மீது தாக்குதலைத் தொடுத்தது.   
    1887 நவம்பர் 11 அன்று     தோழர்கள் எங்கல், ஸ்பைஸ், பிஷர், பார்சன்ஸ் ஆகியோர் தூக்கிலிடப்பட்டனர்.  நவம்பர் 13 1887 அன்று நடைபெற்ற இறுதி ஊர்வலத்தில் 5 லட்சம் பேர் பங்கேற்றனர்.            

    எட்டுமணி நேர வேலை என்ற அடிப்படையான அரசியல் கோசத்தை முன்வைத்து தொடங்கிய போராட்டத்தின் போது, அமெரிக்காவில் கொல்லப்பட்ட தொழிலாளர்களின் நினைவு நாளாக இதை அனுஷ்டிக்கிறோம்.
     இந்தியாவிலேயே முதன் முதலாக மே தினம் தமிழ்நாட்டில்தான் 1923 ல் சென்னையில் அறிமுகப்படுத்தப்பட்டது. சிந்தனைச் சிற்பி சிங்கரவேலரால் நடத்தப்பட்டது. 
     இந்த நாளில் நாம் எமது கைகளை உலகத்தொழிலாளி வர்க்கத்துடன் ஒருசேர உயர்த்தி, போராடக் கற்றுக் கொள்வோம். நாம் வர்க்க உணர்வு பெற்றுக் கொள்வோம். இத்தினம் உலகெங்கும் உள்ள தொழிலாளி வர்க்கம் தனது வர்க்க உணர்வோடு ஒன்றுபட்டெழுந்த நாள்.  
     
     இது ஒன்றும் உழைக்கும் வர்க்கத்தின் ஒய்வு நாள் அல்ல.  பொழுது போக்கும் களியாட்ட நாளும் அல்ல. இந்த நாள் முதலாளியின் இரக்க உணர்வில் உருவான நாளும் அல்ல. 
     மாறாக மூலதனத்துக்கு எதிராக பாட்டாளி வாக்கம் இரத்தம் சிந்தி போராடிய நாள்.  உலக தொழிலாளர் வர்க்கத்தின் நலனுக்காக போராடி பலர் மரணித்த நாள்.  
     தொழிலாளர்களின் உரிமைப் போராட்டத்தில் உலக முதலாளிகள் கற்றுக்கொண்ட பாடம் இன ஒடுக்குமுறை.   அதனால்தான் தோழர் லெனின் உலகத் தொழிலாளர்களே ஒன்றுபடுங்கள் என்றார்.
     ஒடுக்கும் இனத்தின் தொழிலாளர்கள் ஒடுக்கப்படும் இனத்தின் விடுதலைக்குப் போராட வேண்டும் என்றார் லெனின். 
         தொழிலாளர்களின் வலியையும், வலிமையையும் உணர்ந்தவர்களாக, தொழிலாளர் வர்க்கத்திற்கு அனைத்தையும் உரிமையாக்க  பாடுபடுபவர்களாக   அணி திரள்வோம்.  


அனைவருக்கும் மே தின வாழ்த்துக்கள்.

தோழமையுடன்,
எஸ். சிவசிதம்பரம். 
பட்டுக்கோட்டை.          

மாவட்டக் குழு கூட்ட அழைப்பு

18-04-2012  புதன் கிழமை காலை 10 மணி 

                                                        இடம்: தஞ்சை கீழராஜ வீதி கட்சி அலுவலகம். 

வழிகாட்டும் தோழர்கள்:

     தோழர். C. மகேந்திரன் அவர்கள், 

            மாநிலத் துணைச் செயலர்.

     தோழர். இரா. முத்தரசன் அவர்கள், 

             மாநில செயற்குழு உறுப்பினர்.

பொருள் 

1.  அகில இந்திய கட்சி பேராய முடிவுகள்.

2. மாநிலக் குழு முடிவுகள். 

வேண்டல் 

உரிய நேரத்தில் தங்களின் தவறாத வருகை. 

                                                                                          தோழமையுடன்,

                                                              R. திருஞானம், மாவட்டச் செயலர், தஞ்சை.

                     

 பேராவூரணியில் விவசாயிகள்  சங்கப் பேரவை 

                       நாளை 16-04-2012 காலை 10 மணிக்கு விவசாயிகள்  சங்கப் பேரவை பேராவூரணி  கட்சி அலுவலகத்தில் நடைபெறுகிறது. நமது மாவட்டச் செயலர் தோழர் அ.பன்னீர்செல்வம் அவர்கள் பங்கேற்று விளக்கவுரையாற்றுகிறார்.  அனைத்து விவசாயிகளும் பங்கேற்று சிறப்பிக்குமாறு அன்புடன் கேட்டுக்கொள்கிறேன். 

தோழமையுடன்,

பா. பாலசுந்தரம். 

தஞ்சை மாவட்டத் தலைவர்,

விவசாயிகள் சங்கம், 

திருச்சிற்றம்பலம்.